Vaļds Lauskys

Materials nu Vikipedeja
Jump to navigation Jump to search

Vaļds Lauskys (taipoš: Valdis Lauskis, Валдис Лаускис; dzims 1957 g.) — vīns nu pošu zeimeiguokūs Latgolys politiku, Latvejis 7 Seimys deputats, pošvoldu deputats, latgaliskuos kulturys atdzimšonys vadynuotuojs i atspaiduotuojs.

Dzims Daugpilī 1957 g. apreļa 29 d., beidzs Daugpiļs 1 vydsškolu, Daugpiļs universiteta Fizikys i matematikys fakuļtetu. Piec universiteta Ukrainā beja profesionals volejbolists SSRS vysuaugstajā ligā. 1986 godā grīzēs da Daugpiļs, beja Daugpiļs 1 vydsškolys direktora vītinīks.

Suocūtīs Atdzimšonai, īsavadynuoja politikā, beja Tautys fronta aktivists, nu 1990 goda — Latvejis demokratiskuos dorba partejis Daugpiļs atdalis vadeituojs.

1990 godā, kod cēlēs pretiveiba iz vyds Daugpiļs mīsta pošvolda i Latvejis Republikys lykumu (mīsta pošvolds jēme napīzeit tūs sasprīdumu, kuri styprynuoja Latvejis napavaļdeibu), V. Lauskys sataiseja Demokratiskūs spāku padūmi, kura Daugpilī atspaiduoja Latvejis napavaļdeibu. Kūpā ar dūmubīdrim Lauskys sataiseja Demokratiskū radeju, kura beja svareigs atsvors prosovetiskajai agitacejai. Demokratiskūs spāku padūme daudzi dasalykuse pi tuo, ka 1991 g. marta 3 d. referendumā 51,3% Daugpiļs dzeivuotuoju nūbolsuoja par Latvejis napavaļdeibu.

1991 gods septembra 20 d. Latvejis Pošaugstuo padūme pījēme sasprīdumu atstateit Daugpiļs mīsta pošvoldu i pazeimuot laiceigū mīsta voldu, kurs puordrūsynuotu demokratiskys ībolsuošonys organizeišonu. V. Lausku paškeire par laiceiguo volda pirminīku, jis vadeja mīsta vaļdi da 1994 gods, kod pošvolda ībolsuošonā par Daugpiļs meru tyka A. Vidavskis.

V. Lauskys beja Daugpiļs pošvolda deputats, 7 Seimys deputats, Latgolys demokratiskuos partejis pirminīks, LSDSP pirminīka vītinīks.

V. Lauskys irā vīns nu tūs politiku, pateicūt kurim Latvejis Vaļstiskuos volūdys lykumā īraksteita norma ap vaļsteibys garantejom latgalīšu volūdys apsardzeibai i raisteibai.