Anna Dimaņte

Anna Dimaņte (latvīšu: Anna Dimante; 1908—2002) beja latgaļu ailineica, publiciste i ļaudyskūo dareituoja.

Dzymuse 1908. goda 10. novembrī Leiksnys pogosta Seilavskīšu solā. Beiguse Daugpiļs 1. latvīšu pamatskūlu (1926), Vaļstiskū Latgolys lauksaimnīceibys vydsskūlu Malnovā (1930), Latvejis Universiteta Lauksaimnīceibys fakultetu (1938). Darejuse par skūluotuoju Aglyunys lauksaimnīceibys vydsskūlā.

1944. goda rudenī kūpā ar saimi laiduse bāgaleibā caur Kūrzemi iz Vuoceju. Tī darejuse par duorzineicu, pīna dasavāruoju i Haunštetena bāgaļu nūmetnes ļaudyskūo lītu vadeituoju. 1951. godā puorsacyluojuse iz Demoina mīstu ASV, kur darejuse Žāļsirdēbys dzeidātovā. Nu 1971. goda bejuse skūluotuoja latvīšu skūlā ASV.

Aktivi pīsadalejuse bāgaļu latgaļu ļaudyskajā dzeivē. Rakstejuse pjesys, stuoškus i dzeivuļus latgalīšu volūdā. Bejuse „Tāvu zemis kalendara” sastateituoja i redaktore (1986–1990).

Myruse 2002. goda 31. juļā Demoinā, ASV, paglobuota Demoina Glendaļa kapūs.

Pyrmuos publikacejis — „Čekists” i „Par moz” bāgaleibys latgaļu žurnālā „Dzeive”. Ailis apkūpuots krōjumā „Vālī zīdi” (1995).