Latgolys gaisma

Latgolys gaisma (latvīšu: Latgales gaisma) beja vīna nu īteceiguokūs Latgolys parteju piec Latvejis napavaļdeibys atjaunynuošonys (1988). Pats lelais dasnāgums - īveice Daugpiļs pošvolda ībolsuošonā.

Registrāta 2000 g. marta 21 d., partejis aizsuociejs i pirminīks beja Daugpiļs pasajāmuma Stalker prezidents Rihards Eigims.

Latgolys gaisma dabuoja viersa 2000 gods Daugpiļs pošvolda ībolsuošonā (7 deputatu vītys), aplīcūt Daugpiļs mīsta partejis i partejis Latvijas ceļš kūpeigū sarokstu (nu juo pošvoldā ītyka 5 deputati, jūs vydā i pyrmuokais Daugpiļs mers Aleksandrs Vidavskis), PCTVL (2 deputati) i LSDSP (1 deputats). Piec ībolsuošonys Latgolys gaisma Daugpiļs pošvoldā sataiseja koaliceju ar PCTVL i socialdemokatim, a par mīsta meru tyka Latgolys gaismys viersinīks Rihards Eigims.

Parteja pīsadaleja Latvejis 8 Seimys ībolsuošonā 2002 gods oktobra 5 dīnā. Par Latgolys gaismu Latgolā nūbolsuoja 9,3 % izlaseituoju, tok vysys Latvejis mārā parteja dabuoja viņ 1,5 % bolsu i partū navierseja 5 % slīkšņa, kab ītyktu Seimā.

2003 godā R. Eigimam daguoja atsastateit nu mīsta mera daguojumu deļ pagaisynuotuos atsadūšonys iz juo - daudzeji juo partejis bīdri pošvoldā beja tykuši par cīši škaļdeigi. Nu 2003 da 2007 g. Latgolys gaisma beja golvonuo opozicejis parteja Daugpilī.

Parteja likvidāta 2007 g. februara 8 d.