Ontons Zvīdris (muokslinīks, literats)

Materials nu Vikipedeja

Ontons Zvīdris (1911 — 1992) — latgaļu muokslinīks, ailinīks, dramaturgs.

Dzims Rēznis apleiciņa Makašānu pogosta Lelpujatūs. Vuicejīs Rogoukys pamatškolā, beidzs Tukuma vaļstiskū pīnsaimesteibys školu. Darejs Jaunkolsnovys pīnineicā, Reigys golvonajā postā, Vaļmerys autobusu parkā. Ūtruo pasauļa kara laikā 1942 g. nūsyuteits dorbūs iz Vuoceju, tics bāgaļu siedeibā Flensburgā, vuicejīs Diseļdorfa muokslys akademejā. Izbraucs iz Angleju, nu 1949 g. dzeivuojs Kanadā, Torontā. 1962 godā ar paraudzeibu beidzs muokslys školu, piečuok aktivai tepiejs, riedejs paruodis Torontys bibliotekumuokslys galerejuos.

Oleja tepiejumūs, kūka skulpturuos, taipoš poezejā i publicistikā O. Zvīdris atvaiguojs Latgolys viesturi, tāvainis tveikys, religiskus motivus, zemisvierīņus i pučis, radejs latgaļu kulturyskūs i ļaudyskūs dareituoju, izslyvušu bazneicnīku portretus. O. Zvīdra tepiejumim soveigs gaišs i valeims pasavierīņs iz ļaužu i dobys, sovus guodus muokslinīkam meiliejīs izsaceit caur alegorejom. Juo tepiejumu kolorits atspeidynoj ideju emocionalū īkruovīni nu gaišai sauļuotu da dramatiskai tymsu, nu naramūni viestejūšu da trāpu i mīronu kruosu salykumu.

1991 godā O. Zvīdris paduovynuoja Latgolys kulturviesturis muzejs 33 sovus tepiejumus i 8 skulpturys.

Poezejis lasejumi:

  • Tu (1974);
  • Kod sirds teik gunkurs ("Kad sirds top ugunskurs", 1981);
  • Dvēselis tveikys i suope ("Dvēseles ilgas un sāpes", 2001).

Aiļu volūda cīšuok latvyska kai latgaliska, koč aizraksteita lītojūt latgaļu ortografeju. Poetika i ritmika dzeiveiga, šaļtim skaiški kaitaveiga.

Pjesu lasejums:

  • Dramys (1977).

Verīs taipoš[pataiseit | labot pirmkodu]