Skaistvabalis
| Skaistvabalis | |
|---|---|
| Fails:Buprestidae-1.jpg Skaistvabaļu kolekceja | |
| Ziniskuo klasifikaceja | |
| Pasauļs | Dzeivinīki (Animalia) |
| Tips | Puosmkuoji (Arthropoda) |
| Klase | Kustūne (Insecta) |
| Aiļa | Vabalis (Coleoptera) |
| Saime | Skaistvabaļu saime (Buprestidae) |
| Ziniskuo pasauka | |
| Buprestidae | |
| Paplateiba | |
Skaistvabalis (latiņu: Buprestidae; anglīšu: Jewel beetles; latvīšu: Krāšņvaboles; lītaunīku: Blizgiavabaliai) - vysaāduoju vabaļu saime, kuramā vaira kai 15 000 škiru 450 giņtīs. Latvejā dzeivoj 45 škiru skaistvabalis.[1] Vysuvaira skaistvabalis dzeivoj tropu i subtropu klimatā. Lelys i cīši kruosainis skaistvabalis irā augši viertietys kustūņu kolekcionaru vydā. Kuru nakuru škiru viersspuorni tradicionalai lītuoti juveliru dorbūs i tautys dekorejumūs nazcik Azejis vaļsteibuos (Japonejā, Iņdejā, Taizemē).
Aproksts[pataiseit | labot pirmkodu]
Vysaižu māru vabalis, garumā nu 3 mm da 100 mm. Forma drupeit leidzeiga spradzem. Antenys leidzeigys dīgam. Prīkškryuteža gludai i nakusteigai saauguse ar vydskryutežu. Viedereņš sasadora nu 5 segmentu. Kuojis pīcdaleigys. Skaistvabalis - syltummeilūša saime. Vabalis sateikamys sauļuotuos, syltuos dīnuos mežamoluos ci mežapļovuos iz zīdu i kūku viersys. Namosnai skraida. Saauguši ād zīdaputekli ci grauž lopys.
Pošlelī īnaidnīki irā dzeni, kuri nu kūkim izkņuopoj skaistvabaļu kuopurus.
Zeimeiba[pataiseit | labot pirmkodu]
Lelums skaistvabaļu puordora nūsaguozušus kūkus ci calmus i irā cīši līteigys - dreizynoj kūknys sakrisšonu. Tok kurys nakurys škirys grauž i vasalus kūkus ci zaļūs auguojus i irā vuodekli. Latgolā vysuvaira vuodis var padareit tik kurys nakurys šaurspuorņu (Agrilus) i Anthaxia škirys.
Nūruodis i olūti[pataiseit | labot pirmkodu]
- ↑ Dimitrejs Teļnovs (2004). Latvejis Entomologejis bīdreiba. Latvejis vabaļu (Insecta: Coleoptera) škiru saroksts. ISBN:9984-9768-0-7
