Vera Daškeviča

Materials nu Vikipedeja

Vera Daškeviča (taipoš Veronika Daškeviča, Vera Daškevič, Veronika Daškevič) (1898 — 1960) — latgaļu kulturys dareituoja, zeimeiga latgalīšu volūdys vuiceišonys metodike, latgaļu školu vuiceibys gruomotu autore.

Dzymuse Ribinišku apleicīnē. Vuicejusēs Pīterpiļs latgalīšu školuotuoju kursūs. Bejuse školuotuoja Preiļūs i atsaceiguo par školu dorbu Viļānu apleicīnē. Nu 1920 g. dzeivuojuse Moskovā, darejuse Moskovys latvīšu-latgalīšu kulturvuiceibys brīdreibā „Prometejs” i ituos bīdreibys izdūtuvē. Padarejuse lelu dorbu latgalīšu volūdys populariziešonā, latgalīšu raksteibys vaicuojumu parādavuošonā i volūdys vuiceišonys metodikys darynuošonā latgalīšu školom. Stalina režima "etniskūs teireišonu" laikā 1937 godā represāta, atbejuse politiskā aizspīstumā 20 godu. Myruse Tulys apgabaļa Aleksinā.

Dyžan svareigs V. Daškevičys īlicīņs latgalīšu vuiceibā. Ap 1933 – 1934 godu Krīvejā jau beja 79 latgaļu pamatškolys i 6 zemnīku jaunīšu školys[1], taipoš Ačinskā dareja latgalīšu pedagogiskais tehnikums (īstateits 1931 godā), i pi juo – školuotuoju kursi. Ap 1934 godu vysuos latgalīšu školuos 1 – 2 klasē vuiceibys nūtyka viņ pa latgaliskam. V. Daškevičys pīraksteituos i sastateituos gruomotys, vuiceibu programys i metodiskūs nūruodejumus SSRS vuiceibys tautys komisariats beja apstyprynuojs par oficialai izlītojamim Krīvejis latgaļu školuos. Taipoš zeimeigi V. Daškevičys dorbi, kurymūs sprīsti latgalīšu raksteibys vaicuojumi. Juos pīzynumi latgalīšu literaruos volūdys standartizacejis tecīnī aktuali pa šai dīnai.

  • V. Daškevičys pīraksteituos gruomotys
    • Latgalīšu volūdas mōceibas grōmota sōkuma školai. Gramatika un pareizraksteiba. II daļa. 3. un 4. klasem. — Moskova-Novosibirsks, 1934
    • Ortografisku vyngrynōjumu krōjums sōkuma školas ūtrai klasei. Ūtrō daļa. — Moskova, 1936
    • Latgalīšu volūdas gramatika. Mōceibas grōmota napylnai vydsškolai. Pyrmō daļa. Fonetika un morfologija. Pīktō klase. — Moskova, 1936
    • Ortografisku vyngrynōjumu krōjums. Pyrmō daļa. Napylnōs vydsškolas pīktai klasei. — Moskova, 1937
  • V. Daškevičys sastateituos, puorvārstuos i latgalīšim adaptātuos gruomotys
    • Dorbs. Losoma gromota latgališu školom: I. un II. školas godam. Porstrodojuši nu latvišu losomgromotas "Darbs" A. Eisuļs un V. Daškevič. — Moskova, 1926 (kūpā ar A. Eisuli)
    • Oroju zeme: Abece-losomgromota / tulkoja un porstrodoja nu krīvu abecem «Наша нива — наша сила» un «Наша сила — советы» V. Daškeviča un [A.] Eisuļs. — Moskova, 1926 (kūpā ar A. Eisuli)
    • Grīslis M. Matematika latgališu školom: 2. moceibas gods / tulk. nu latv. vol. V. Daškevič. — Moskova, 1928
    • Daškeviča V. Padūmu cīms: Dorba gromota cīmu školom deļ skaiteit-raksteit naprasšonas likvidešonas; nu krīvu volūdas «Советская деревня» tulkoja un porstrodoja V. Daškevič. — Moskova, 1930
    • Literaturas hrestomatija.2. d.: sōkuma školai: 4. klasei. — Moskova-Novosibirsks, 1934 (kūpā ar A. Mežuli)
    • Bārnim par zvārānim / sakūpōja un tulkōja V. Daškevič. — Moskova, 1936
    • Lauksaimisteibas rokstu krōjums / sakūpōja V. Daškevič. — Moskova, 1936
    • Barto A. Brōleiši / tulkōja V. Daškeviča; zeimiejumi E. Grīnvaļda. — Moskova, 1936

Nūruodis i olūti[pataiseit | labot pirmkodu]

  1. Leikuma L. Veras Daškevičas latgaliešu valodas grāmatas skolai. // Материалы XXXIII международной филологической конференции. Секция балтистики... Тезисы докладов. — Санкт-Петербург, 2004, c. 21 – 22;
    Латгальская книга в России (1917–1937). Каталог выставки 14.02–14.03.2007 – Санкт-Петербург, Российская национальная библиотека, Санкт-Петербургский государственный университет, 2007