Latgolys karūgs

Materials nu Vikipedeja
(Puoradresēts nu Latgalīšu karūgs)
Najaukt ar Latvejis karūgu, kurs radeits, izlītojūt senejūs latgalīšu (senejūs latgaļu) karūga vuordysku aprakstejumu Livonejis Atskonu kronikā.
Oficials Latgolys karūgs
Latgalīšu karūgs (apstyprynuots "Latgolys Saeimā" 2010 g.)

Latgolys karūgs aba latgaļu karūgs, aba latgalīšu karūgs (latvīšu: Latgales karogs, latgaliešu karogs, latgaļu karogs) irā nu 16 godusymta zynomuo Latgolys gerba (bolts grifs iz sorkona fona) myuslaiceigs izpiļdejums iz Latvejis vaļstiskuo karūga samārā izlykalātu latgalīšim soveiguos tymsai zyluos i boltuos kruosys streipu fona.

Karūgā radzamais gerbs ar boltu grifu iz sorkona fona kai Latgolys (Infļaņtejis) gerbs lītuots nu 16 godusymta da 1921 godam, cikom Reigā oficialai naapstyprynuoja cytaida Latgolys gerba, kurs izaškir nu viesturiskuo. Zyluo kruosa latgalīšu karūgā simbolizej senejūs latgalīšu muokslu (mieļu vylnainis), Latgolys azarus i upis, naktineicu zīdus i lynazīdus. Kruosu streipu samārs izlītuots taids pat kai Latvejis vaļsteibys karūgā, līvu karūgā i Sielejis karūgā, tai simbolizejūt Latvejis regionalūs kulturu vīneibu. Pa heraļdikys princypim, praktikā varams lītuot i zylai-boltai-zyluo latgalīšu karūga variaceju bez grifa.

Latgalīšu karūgs apstyprynuots latgalīšu pīstuoveibys organizacejā "Latgolys Saeima" Rēznē 2010 godā, īsvieteits Aglyunā 2011 godā. Latgolys planavuošonys regiona raisteibys padūme 2011 godā suokuse sarunys ar Latvejis Heraļdikys komiseju ap latgalīšu karūga apstyprynuošonu taipoš par Latgolys regiona karūgu.

2023. goda 21. aprelī beja oficialai apstyprynuots karūgs bez gerba kai Latgolys oficials karūgs.[1]

Verīs taipoš[pataiseit | labot pirmkodu]

Uorejuos nūruodis[pataiseit | labot pirmkodu]